दे दु:खावर पुन्हा नवा मी डाग म्हणालो

मनात जे जे तुझ्या दाटले सांग म्हणालो
उधळून टाकीन तुला हवे ते माग म्हणालो

किती सांत्वने किती दिलासे विटलो जेव्हा
सहानभूतीला कर्तव्याचा भाग म्हणालो

फक्त डोलतो जो बुद्धीला गहाण टाकून
समाजास त्या गारुड्याचा नाग म्हणालो

लुटून नेले सर्वस्वाला त्या चोराने
काम संपले असेल तर मी भाग म्हणालो

अशी अचानक कशी वेदना बोथट झाली
दे दु:खावर पुन्हा नवा मी डाग म्हणालो

.....कैलास गांधी