दुख: देखणे माझे सुंदर....

दुख: देखणे माझे सुंदर हळूहळू जे छळते आहे
कुणा न ठावे वात पेटली किती खोलवर जळते आहे

मला वाटले पुसून टाकल्या आपल्या मधल्या सीमारेषा
इतक्या वर्षानंतर दोघांमधले अंतर कळते आहे

तुझा कवडसा यावा म्हणुनी मीच छताला खाच मारली
उगाच म्हणती लोक आता की माझे छप्पर गळते आहे

दिसणार नाहीस आता तू पुन्हा कधीही त्या वळणावर
पाऊल माझे अजून तरीही त्याच दिशेने वळते आहे

.....कैलास गांधी