श्रावणभूल

वाऱ्याची घुमते शिळ...
तसा घननीळ... वाजवी पावा
झरझर जातसे सर...
डोंगराआड कोणत्या गावा

बेभान होतसे वारा
घाली येरझारा...वेड्यावाणी
झाडास भरतसे चाळा
वाजवी टाळ्या... पानोपानी

पक्षांच्या चालल्या ओळी
खाली रांगोळी... सावल्यांची
ओढ्याची चालू खळखळ
कि बोलतो...बाळ पाळण्याशी

संन्यस्थ उभा तो वड
नदीकाठाड... वाकलेला
पारंबी खेळतो पक्षी
रंग गुलबक्षी... माखलेला

हलकेच येतसे उन
डोळे मिचकून... धुंद नाचे
नदीस लागले खूळ
शोधते मूळ... सागराचे

काळजात उतरली ओळ
जातसे तोल... सावरेना
धुक्यात हरवला गाव
शोधूनी ठाव... सावरेना

- कैलास गांधी